Dili, 29 Novembru 2025 – Komisaun Nasional Desportu (KND), iha kolaborasaun ho Komite Paralimpiku Nasional Timor-Leste (KPNTL), realiza programa edukasaun anti-doping hodi suporta atleta no treinador sira ne’ebé prepara ba ASEAN Para Games 2025. Inisiativa ne’e ho objetivu atu asegura katak partisipante hotu-hotu kumpre rekizitu edukasaun obrigatóriu anti-doping no hetan sertifikasaun ho susesu molok partisipa iha ASEAN Para Games.
Programa ne’e fornese edukasaun kona-ba tópiku anti-doping xave sira, inklui substánsia no métodu sira ne’ebé bandu, prosedimentu kontrolu doping, autorizasaun uzu terapeutiku, no direitu no responsabilidade atleta sira-nian no pesoál apoiu sira. KND mós oferese asisténsia no orientasaun direta hodi tulun atleta no treinador sira atu kompleta modulu hirak ne’ebé presiza, hodi hamenus risku ba violasaun anti-doping ne’ebé la ho intensaun.
Inisiativa ida-ne’e atu promove desportu ne’ebé moos, proteje atleta sira-nia saúde, no apoia prinsípiu justisa no integridade iha kompetisaun. Liu husi kolaborasaun ida-ne’e, KND no KPNTL afirma sira-nia kompromisu atu prepara atleta sira iha Timor-Leste atu kompete ho responsabilidade no konfiansa iha ASEAN Para Games 2025.